Краеведческие заметки

Миннигараева Е.

Учкакарез учкысал

Кузьмапи гурт возысь ик шедьтэмын бурдъессэ волъям туй тылобурдо. Со влэ пыкиськыса, тодмо суредась Юрий Лобанов лэсьтиз Удмурт Республикалэсь кунпуссэ.

«Иднакар» приборез кылдытэмзы но уже кутэмзы понна тодосчиос Маргарита Ивановна но Игорь Журбин пусъемын «Достояние поколений» премиен но Удмуртилэн кун премиеныз. Музъем пыр учкыны быгатись комплексэз кылдытиз Игорь Журбин. Нош ужаны нырысьсэ со эскериськиз Маргарита Ивановналэн кивалтэмезъя Иднакарын гудиськонъес дыръя.

Дауръёс чоже музъем пушкын ватиськыса кыллем арбериосты, портэм юдэсъёсты-чалепъёсты шедьтыса, археологьёс «суредало» вашкала дуннеез. Озьы син азямы пуксё уно сю аръёс талэсь азьвыл кылдэм удмурт каръёс - Иднакар, Гуръякар, Дондыкар... Кызьы улизы вашкала выжыосмы? Кычеесь вал соос? Малы оскизы но кинэн возизы вуз карон кусыпъёс?

Удмурт калыклэн вашкала историез трос тунсыкоз ватэ на. Та сярысь вера Историяя, кылъя но литературая Удмурт институтысь тодосчи, история наукаосъя доктор, профессор Маргарита Иванов:

- Маргарита Григорьевна, ти уно аръёс чоже кивалтиды уйпал удмуртъёслэсь шоркарзэс - Иднакарез - эскеронэн. Кылиськиз: табере выль проект борды басьтиськиды. Маин со паймытоз?

- Туэысен кутскимы Учкакарын гудиськыны. Таиз вашкала кар интыяськемын Яр ёросысь бырем Кушмангуртдорын, Чупчи шурлэн бур ярдураз. Иднакар но Гуръякар вашкала городъёсмы сямен ик, Учкакар удмуртъёслэн огез бадзымез карзы вылэм. Со умой-умой юнматэмын вал тушмонъёслэсь. Али учкыса но, адзисько на кык бордъёс.

Учкакар - шор дауръёсысь бадзым кар. Солэсь кыдёке ик овол интыяськемын вашкала шай, бырем гучинъёслэн (бордъёсын юнматымтэ поселение) бервылъёссы. Озьы Учкакарен валче эскерыны луоно та синпелетьёсты но.

Мургес чаклано ке, Учкакар сярысьдотомо ни вал 19-ти даурлэн пумаз ик. Та инты соку ини тодосчиослэсь мылкыдзэс бугыръяз, малпаськытиз. Отчы вуылиз тодмо этнограф Николай Первухин, вашкала инты сярысь гожъяз, аслаз книгаяз пыртиз. Но гудон ужъес соку оз мынэ.

Учкакарын гудиськон кутскиз 1930 арын. Со бордын удмуртъеслэн «Боляк» обществозы отемъя ужаз Москваысь археолог Алексей Смирнов. Тодмо фин-угор археолог чыжы-выжы калыкъёсмылэн шор дауръёсы улэмзы сярысь трос научной ужъёс печатлаз. Учкакарын гудиськонъёс дыръя со эскериз улон юрт бервылъёсты. Шедьтэм тирлыкез бадзым коллекцие люкамын вал. Уноез утиське Россиысь история огаз тужгес бадзым музейын.

1930-ти аръёсы Учкакарез эскеронъя материалъёс печатлатэк кылизы - кутскизы секыт вакытъёс, репрессиос. Но улонысь кошкон азяз Алексей Петрович Смирнов со материалъёсты мыным печатланы оскиз. Со понна монэ юри нуллиз Москваысь Историяя кун музее, тодматиз отысь кивалтисьёсын. Мон соку, 1970-ти аръёсы, Алексей Петровичлэн аспиранткаез вал. Соин ик кызьы быгати - ужъёссэ дасяй.

- Нош малы, сыче бадзым вис карыса, та уж борды выльысь берытскиды?

- 2007-ти. 2010-ти аръёсы та интыосты учкыса потиз Удмурт Республикаысь «Иднакар» музей-заповедниклэн директорезлэн воштисез Андрей Кириллов. Со сюлмыз шуген пусйиз: вашкала синпелет интыос отын-татьн бугыръямын, нош кык утиськон бордъёс вискыти машинаен ветлон сюрес донгемын. Ваньмыз со туж сюлмасысытиз.

Эшшо секытгес югдур кылдиз Кушман шайвылъёсын (Кушманский могильник). Бадзымос люкетэз лушкаськисьесын бугыръямын-таркамын. Нялтас вераса, соин ик Учкакарез эскерон борды выльысь басьтиськем нуналысен бордамы итиськизы Россиысь Культурая наследиез кутонъя но реставрация центрысь специалистъёс.

Учкакар Прикамьеысь одигез бадзым синпелет луэ. Али отын гудиськонъёс мыно Россиысь Фундаментальной эскеронъёсъя фондлэн грантэзъя. Та грантэз утиз Физикая но техникая Удмурт институт. Озыы ми геофизикъёсын, биофизикъесын чош тыршиськом., Ссослы туж бадзым тау кареме потэ. Эскеронъессы зол юртто кулэ интыосты шедьтыны.

- Туала археологъеслэн ужзы зол-а висъяске азьвылэзлэсь? Кыче выль технологиосты кутиськоды?

- Тодам лыктэ Иднакарез нырысьсэ копаны кутскеммы. Соку гудиськиськом вал, шодонмы вылэ гинэ пыкиськыса.

Али геофизикъеслэн эскеронъёссыя гудиськытэк но адзиське ни: мае ватэ музьем, кытын сылиллям юртъес, борддоръёс, гуръёс. Милемлы со интыысь сюез сиен-сиен утялтыны гинэ кыле на. Туэ толэзь но жыны ужамы. Но муэз 80 сантиметр мурда гинэ чакламы. Нош геофизикъёслэн эскеремзыя, гудоно интыямы 1 но жыны метр мурдазэ чаклано.

Милемлы зол юрттэ «Иднакар» аппарат. Сое кылдытиз Физикая но техникая Удмурт институтысь тодосчи, техника наукаосъя кандидат Игорь Журбин. Та аппаратэз паськыт куто ини Россиысь трос синпелетъёсты эскеронын, Полярной круг сьорысен кутскыса Уйпал Кавказозь. Ачиз Игорь Витальевич но археологиен «висьыны» кутскиз. Портэм эскеронъёсы пыриськиз но история наукаосъя тодосчи луиз.

Пусъеме потэ созэ но: азьвылэн чошаатыса, али ожытгес музьемез бугыръяськом, но ужмы кемагес мынэ. Угось котькуд шедьтэм арбериез отын ик компьютере пыртиськом на.

- Маин Учкакар висъяськиз мгукет вашкала удмурт каръеслэсь?

Паймымон: со сыче зол кельше Иднакарлы! Котыр ласянь. Зэм, коня ке портэмлыкез вань ик. Шуом, Учкакар лапеггес вырйылэ интыяськемын. Солэн быдзалаез 3 гектар пала. Иднакарлэн – 4 гектар. Пуктиськемьёс ласянь но юанъёс кылдо. Но кулэ умой-умой эскеронъёс ортчытыны. Иднакарын гудисыооньёс 37 ар чоже мыно ини, нош Учкакарын – али гинэ кутско. Соин, малпасько, вань тужгес тунсыкоез - азьпалан.

Туэ, «Иднакар» прибор вылэ пыкиськыса, Учкакарын физикъёс музъем улысь шараязы сутэм горд сюй интыез. Борысь отын гудиськонъёс возьматизы: татын сылэм горд сюйлэсь бадзым гур. Отын кема дыр чоже тылскылиллям. Котырысьтыз шедьтимы пойшуръёслэсь трос лыоссэс, эгыр. Малпаськом, со – пойшуръёслэсь портэм арбериос лэсьянлэн бервылыз. Тапалась ик шедьтэмын туж трос ужан тирлык, чеберъяськонъёс, лылэсь но кортлэсь арбериос, турлы буёло пиялалэсь весьёс. Нырысьсэ шедьтэмын кизили пусэн тирлык. Портэм пусъесын коллекциямы сычеез ой вал на. Вань арбериос «Иднакар музее келямын.

Учкакарын эскеронъёсын чош ик туэ гужем пичияк гудиськонъёс вал вашкала шай интыын. Отчы шор дауръёсы ватиськиллям Учкакарын улисьёс. Эскеремын куинь шайгу - пинал пияшлэн, нылашлэн но батыр мугоро пиосмуртлэн. Жаляса верано, та шайёс азьвылгес ай зол таркамын вал лушкаськисьёсын. Соин тросэз арбериос качамын.

- Макем чем пумиськоно луэ «сьод археолог» шуонъесын?

- Кам котырын - чем. Малы? Отын трос шедё пойшур, тылобурцо тусо лэсьтэм вашкала удмурт арбериос, чеберъяськонъёс, шильтыртись макеос. Сьод рынокын соос дуно сыло. Сыче пойшур тусо арбериослэн аспортэм кужымзы зань шуыса лыдъяло.

1980-ти аръёсы ай Кез ёросысь Тольён, Дэбес ёросысь Варни гуртын улисьёс вераллязы: иномаркаен лыктыса, пе, интыысь трактористэз музъемез доннгытыса, утчаськизы. Кемалась овол Дондыкарын кырмемын корт утчась арбериен (металлоискатеель) ветлись воргорон. Ярам, Иднакарез музей-заповедник карем бере отчы пыраны уг дисьто ни. Но мукет интыос ласянь туж шугъяськиськом. Вазиськиськом калыклы: вашкала историмес тус-тас карыны эн лэзе! Йыртэмасьёс сярысь полицие ивортэ.

Малпасько, кемалась кутоно ни «сьод археологъёсын» нюръськонъя лек законъёс. Али сыче муртъёсты кыл кутытон туж секытэн мынэ.

- Челябинск палась вашкала Аркаим сярысь веранъёс быдэс дуннее волмизы. Портэм калыкъёс, куд-ог удмуртьёс но, отысь утчало вашкала выжыоссэс. Но учконо ке, археологъёс Аркаим бервылысь номыр ик сыче-тачезэ оз шедьтэ. Куд-ог эскерисьёс шуо: та синпелетлы юромо сыче реклама лэсьтэмын туристъёсты кыскон понна...

Нош асьмелэн шаерамы сомында вашкала удмурт вашкала бервылъёс – чебересь, узыресь! Оло, милемлы но «пиар» борды рос-просгес басьтиськоно?

- Вань сыче валан - профессионализм. Зэм, дэмлало вал: ойдолэ Глазовлы, соин чош Иднакарлы 1000 ар тырме шуыса, ялом. Елабугалы 1000 ар ни шуыса ялизы ук. Но Елабуга кылдиз вашкала-вашкала дыръёсы со интыын ик сылись кар (городище) вылын. Нош Глазов но Иднакар ог-огзылэсь воксё портэм.

Иднакар - вашкала удмурт кар, кылдэмын 9-ти даурлэн пумаз. Глазов вордиськиз ай 1670-ти арын гинэ. Зэм, отчы улыны нырысь ик удмуртъёс лыктизы. Но али со чылкак зуч город, отын воксё мукет сям-йылолъёс. Соин Иднакарез но, Глазовез огинэ колзаны уг луы. Реклама пыкиськыны кулэ исторриысь зэмос фактъёс вылэ.

- Шуом, егит муртлэн романтика мылкыдыз сайказ: археологияя экспедицие пыриськыны малпаз. Нош со понна нимысьтыз дышетскемез овол. Басьтоды-а?

- Мылкыдыз вань ке, инстигутамы мед вазиськоз. Милям чемысь гудисько студентъёс. Жаляса верано, уждун чакламын овол. Но калыкез сюдон радъямын. Улиськом палаткаосын, туж шулдыр инкуазьын. Вуоно арын гужем Учкакарез эскерон бордын ик ужалом. Малпаськом, соку вашкала удмурт кар син азямы рос-просгес пуксёз ни.

1980-ти аръёсы Яр ёросысь ик огысьтыз вашкала шайысь (Кузьмапи гурт дорысь) шедьтэмын «самит» нимаськись буртчин кесэг. Сое лэсьяло вал 11-ти - 12-ти дауръёсы Констанинопольын гинэ. Сыче буртчин - ас вакытысьтыз туж бадзым узырлык, посолъёслэн кузьымзы. Та шедьтос возьматиз: удмуртъёслэн мукет кунъёсын вуз карон кусыпъёссы юн вал.

Учкакар но паймытоз на, вылды.